عشان انت مصرى .

عشان انت مصري لازم تعاني وتفقد كرامتك بكل المعاني وتحرق في دمك سنين مش ثواني واوعي تصدق كلام الاغاني بتاع الحضاره وكاني وماني ده كله هجايص مايدخل وداني عشان انت مصري العذاب بيناديك بتبدأ في يومك حاجات بترازيك في نومك في قومك تعكنن عليك تضايقك ولسه العماص في عينيك مافيش ميه تشطف صابونه في ايديك وجسمك ملزق وريحتك عاديك فتلبس وتنزل وفيك اللي فيك ورايح لشغلك حتحتاج مواصله ادي المترو واقف وكهربته فاصله وفي الميكروباص خناقه وحاصله اوتوبيس فرامله عايزالها وصله وتوك توك ده تايه ومحتاج لبوصله بتوصل لشغلك بدم اتحرق في زحمه وكتمه وحر وعرق رئيسك سايبلك كومه ورق ده غير دمغه ضايعه وملف اتسرق وفي كام مواطن عاملك قلق بيشكي تقول له روح اندعق وعركه وهوجه وشاي اندلق ومخك خلاص من الصداع اتفلق هترجع لبيتك ده لو كان في بيت هتوصل هتندم ياريتك ماجيت مراتك تصرخ خلاص استويت عيالك بتطلب وهات كيت وكيت تزعق تهاتي ياناس اتهريت ولاحد سامعك مهما هاتيت عشان انت مصري وده للاسف فلازم تأسي تعيش تتقرف وكل الاساسي في حياتك ترف فتنسي الكرامه وتنسي الشرف وتسرق وتنصب أو تنحرف ودمعك بيجري وجرحك نزف مش انت اللي مصري؟؟؟؟ جتك القرف أحمد فؤاد نجم